الشاعر شافي السبيعي(يموت الحب)

معاك الحق وبكيفـك ولا انت بعشرتـي مجبور
وأنا من صوبي سامحلك نعم ومبرّي الذمّه

وتأكد واللّي خالقني انا لاقلت لك معذور
مجرد واقعي يحلم يعيش بواقع يهمه..!!

على النيّه أنا عايش على الدنيا بصدق شعـور
أعيـش وصدمتي أصعب خيانه تصدم الأمـّـه

عليك الّله ياذاك الشعور البارد المهجور
هدمت أغلى طموحاتي وقتلت الحلم من يمـّه

وهدمت بقلبك القاسي سنيني تحتسبها سطور
ومشاعر قلبك اللاّهـي انا ادري ماهي مهتمّه

أحسبك يالوفا بتجبر حطام الخاطر المكسور
واشوفك للأسـف عايش مثلهم شـــرّك تعمـّه

وشالّلي يفرق الجاحد عن الّلي خان وعاش الدور
اذا ماكان هذا هو أخو لهذا! ولد عمه

غريبه قلوب ماترضى تعيــش وتكشـف المستور
تخاف تعيش واقعهــا رغم مالواقع تضمه

واذا انت بخاطرك كلمه أو ببالك سؤال يـدور..
أبد لايشغلك قلبٍ عشانك مات فـي همه

مادام أن الوفا بيـن الحبايب ماخذا له دور
يموت الحب لعيون الفراق الّلي هدر دمّه